Trump heitir Abbas því að ná fram friði fyrir botni Miðjarðarhafs

Donald Trump, forseti Bandaríkjanna, heitir Mahmoud Abbas, forseta Palestínu, því að Bandaríkjamenn muni ná að leiða Ísraela og Palestínumenn til friðar.

Abbas er um þessar mundir í opinberri heimsókn í Bandaríkjunum og hitti leiðtoginn Bandaríkjaforseta í dag í Hvíta húsinu, en með fundinum vonast Bandaríkjamenn til þess að komast nær því að hefja friðarviðræður milli deiluaðila að nýju.

Á sameiginlegum blaðamannafundi leiðtoganna tveggja var Trump afar jákvæður og sagði hann að hann teldi sig geta náð fram, því sem enginn forseti Bandaríkjanna hefur náð, frá því deilurnar hófust fyrir botni Miðjarðarhafs í lok síðari heimsstyrjaldar, með stofnun Ísraelsríkis árið 1948.

Ég hef ætíð heyrt að erfiðustu samningarnir til að ná, yrðu samningar á milli Ísraela og Palestínumanna. Sjáum til hvort við getum ekki afsannað þetta. Við munum klára þetta.

Abbas tók vel í orð Trump á fundinum og sagði hann að hann vonaðist til þess að Palestínumenn gætu unnið með Bandaríkjunum að sögulegri lausn á deilunum.

Fyrir rúmum tveimur og hálfum mánuði tók Trump á móti Benjamin Netanyahu, forsætisráðherra Ísrael í Hvíta húsinu og kúventi hann þá ríkjandi stefnu Bandaríkjanna í málum deilunnar fyrir botni Miðjarðarhafs, þegar hann sagði að hann styddi ekki lengur „tveggja ríkja lausnina“ svokölluðu, sem kveður á um stofnun ríkis Palestínumanna.

Þá hefur yfirlýstur vilji Trump til þess að færa sendiráð Bandaríkjamanna í Ísrael, frá Tel Aviv, til Jerúsalem, einnig vakið mikla reiði meðal Palestínumanna, sem gera tilkall til borgarinnar.

Hinn 82 ára gamli Abbas, er afar óvinsæll heima fyrir, en hann fer fyrir Fatah hreyfingunni svokölluðu, sem stýrir Vesturbakkanum. Kjörtímabili hans lauk árið 2009 en samt hefur Abbas setið áfram.

Leiðtogar Hamas hreyfingarinnar, sem stýrir Gaza svæðinu hafa fylgst náið með fundi Abbas og Trump, en nýlega gaf hreyfingin það út, að hún muni hætta að kalla eftir gereyðingu Ísrael og vonast margir til að afstaða hennar sé að mildast.

Almennt er talið að erfitt verði fyrir Trump að framfylgja loforðum sínum, en lítið sem ekkert traust ríkir á milli deiluaðila.