Benedikt hættur með Þórsliðin

Benedikt Guðmundsson er hættur þjálfun karla- og kvennaliðs Þórs Ak. eftir tveggja ára starf. Frá þessu er greint á heimasíðu Þórs Ak.

Benedikt kom til Þórs frá Þór Þ. sumarið 2015. Á sínu fyrsta tímabili stýrði hann karlaliði Þórs til sigurs í 1. deildinni. Á þessu tímabili endaði Þór í 8. sæti Domino's deildarinnar og vann sér sæti í úrslitakeppninni í fyrsta sinn síðan 2008. Þór tapaði 3-0 fyrir KR í 8-liða úrslitum úrslitakeppninnar.

Kvennalið Þórs endaði í 5. sæti 1. deildarinnar í fyrra. Í ár urðu Þórskonur deildarmeistarar en töpuðu fyrir Breiðabliki í umspili um sæti í Domino's deild kvenna.

„Ég er virkilega þakklátur fyrir þennan tíma hér fyrir norðan. Hrikalega gaman að hafa tekið þátt í því að rifa upp körfuboltann á Akureyri aftur. Það er svo mikil sál í íþróttafélaginu Þór og það sem einkennir félagið er stórt hjarta og samheldni. Þá á ég við félagið í heild. Hérna er ég búinn að kynnast mikið af góðu fólki. Á Akureyri er frábært að búa og hérna hefur mér liðið virkilega vel. Ég kveð því með miklum söknuði. Það er bókað mál að ég mun koma ansi oft hingað norður í heimsókn í framtíðinni,“ segir Benedikt á heimasíðu Þórs.

Ekki er ljóst hvað tekur við hjá þessum reynslumikla þjálfara en hann segir allt eins líklegt að hann fari aftur í yngri flokka þjálfun.

„Hvað varðar þjálfun er það er algjörlega óljóst enda snýst þessi ákvörðun mín ekki um það heldur hluti eins og t.d. að taka meiri þátt í uppeldi barnanna minna og fleira. Vissulega ætla ég mér að þjálfa áfram og það gæti alveg eins að ég skelli mér í yngri flokka þjálfun aftur. Ég er yngri flokka þjálfari í grunninn og lít alltaf á mig sem slíkan. Ég er alls ekki að flytja aftur suður af því að ég er kominn með annað lið,“ segir Benedikt.

Auk þess að þjálfa Þór hefur Benedikt þjálfað karlalið KR, Grindavíkur, Fjölnis og Þórs Þ. og kvennalið KR á löngum þjálfaraferli.