Dacia Grand Duster á teikniborðinu

Frá því að Renault keypti rúmenska bílaframleiðandann Dacia árið 2004 hefur sá síðarnefndi framleitt og selt yfir fjórar milljónir bifreiða. Nú er fullyrt að Renault íhugi framleiðslu á stærri, allt að 7 sæta fjórhjóladrifnum Duster undir heitinu Dacia Grand Duster.

AutoExpress segir að markmið Renault sé að gera Dacia kleift að svara mikilli eftirspurn neytenda eftir stærri og rúmbetri aldrifnum sportjeppum enda þótt framleiðandinn hyggist alls ekki missa sjónar á mikilvægustu kostum Dacia sem eru áreiðanleiki bílanna og afar hagstætt verð.

Dacia Grand Duster gæti orðið allt að 40 cm lengri en venjulegur Duster og 4,7 metra langur bíll. Hann fengi meira farangursrými en minni gerðin, eða allt að 650 lítrum. Búist er við því að Dacia Grand Duster komi á markað strax á næsta ári og verði lang ódýrasti 7 manna sportjeppi sem býðst.