Benedikt kom báðum Þórsliðunum upp og nú mætast þau í kvöld

Fyrsti Þórsslagurinn í sögu úrvalsdeildar karla í körfubolta fer fram í kvöld þegar Akureyrar-Þórsarar taka á móti Þórsurum frá Þorlákshöfn í Höllinni á Akureyri klukkan 19.15.

Úrvalsdeildin hefur verið með Þórslið í deildinni í 24 af síðustu 30 tímabilum en þetta er þrátt fyrir það í fyrsta sinn sem bæði Þórsliðin eru í deildinni á sama tíma.

Það hefur verið Þórslið í úrvalsdeild karla öll tímabil frá og með 1987-88 nema tímabilin 1992-93, 1993-94, 2002-03, 2004-05, 2009-10 og 2010-11.

Þórsliðin eiga fleira sameiginlegt en nafnið því þau eiga saman manninum það að þakka að þau spila í Domino´s deildinni í dag.

Benedikt Guðmundsson, þjálfari Þórs frá Akureyri í dag kom norðanliðinu upp í deildinni á síðasta tímabili.

Þór úr Þorlákshöfn er á sínu sjötta tímabili í röð í efstu deild en það var einmitt umræddur Benedikt Guðmundsson sem þjálfaði liðið þegar Þór frá Þorlákshöfn komst upp í úrvalsdeildina vorið 2011. Benedikt fór með liðið í úrslitaeinvígið um Íslandsmeistaratitilinn á sínu fyrsta tímabili.

Einar Árni Jóhannsson tók við liði Þórs úr Þorlákshöfn af Benedikt sumarið 2015. Einar Árni er því á sínu öðru ári með liðið.

Þórsliðin mættust einmitt síðast í deildarleik í 1. deildinni tímabilið 2010 til 2011. Seinni leikurinn fór fram í Höllinni á Akureyri 24. febrúar og þar fögnuðu heimamenn sigri 96-76. Benedikt Guðmundsson hafði stýrt sínum mönnum til 24 stiga sigurs í fyrri leiknum í Þorlákshöfn 10. desember 2010.

Aðeins einn leikmaður Þórs frá Akureyri var með í síðasta deildarleik Þórsliðanna en það er Sindri Davíðsson. Í Þorlákshafnarliðinu eru aftur á móti þrír leikmenn en að spila eða þeir Emil Karel Einarsson, Grétar Ingi Erlendsson og Þorsteinn Már Ragnarsson.

Þetta verður annar leikurinn í röð hjá Benedikt Guðmundssyni á móti liði sem hann þjálfaði áður en hann mætti með sína menn í KR-húsið í umferðinni á undan. Benedikt og lærisveinar hans töpuðu á móti KR en höfðu áður unnið Grindavíkurliðið í Grindavík, annað lið sem Benedikt hefur þjálfað í úrvalsdeildinni.

Þórslið í úrvalsdeild karla undanfarin 30 ár:

1987-88 Þór Akureyri 2-14 (8.sæti)

1988-89 Þór Akureyri 3-23 (9.)

1989-90 Þór Akureyri 6-20 (9.)

1990-91 Þór Akureyri 7-19 (7.)

1991-92 Þór Akureyri 2-24 (10.)

1992-93 Ekkert

1993-94 Ekkert

1994-95 Þór Akureyri 18-14 (6.)

1995-96 Þór Akureyri 9-23 (9.)

1996-97 Þór Akureyri 6-16 (11.)

1997-98 Þór Akureyri 4-18 (11.)

1998-99 Þór Akureyri 5-17 (10.)

1999-2000 Þór Akureyri 10-12 (7.)

2000-01 Þór Akureyri 6-16 (10.)

2001-02 Þór Akureyri 8-14 (9.)

2002-03 Ekkert

2003-04 Þór Þorlákshöfn  5-17 (11.)

2004-05 Ekkert

2005-06 Þór Akureyri 5-17 (11.)

2006-07 Þór Þorlákshöfn  5-17 (11.)

2007-08 Þór Akureyri 10-12 (8.)

2008-09 Þór Akureyri 6-16 (11.)

2009-10 Ekkert

2010-11 Ekkert

2011-12 Þór Þorlákshöfn  15-7 (3.)

2012-13 Þór Þorlákshöfn  16-6 (2.)

2013-14 Þór Þorlákshöfn 11-11 (6.)

2014-15 Þór Þorlákshöfn  11-11 (7.)

2015-16 Þór Þorlákshöfn  14-8 (5.)

2016-17 Þór Þorlákshöfn og Þór Akureyri