Airwaves heldur áfram: Sjóðheitur Aron Can og Óttarr Proppé í banastuði

Stemningin var vonum framar á Iceland Airwaves tónlistarhátíðinni í gærkvöldi og mikið um að vera.

Hápunktarnir voru eflaust Airwaves frumraun hins sextán ára Aron Can, sem hefur gert allt vitlaust í tónlistarheiminum upp á síðkastið þrátt fyrir ungan aldur. Aron er meira að segja yngri en Airwaves hátíðin sjálf sem nú er haldin í 18. sinn. 

Hann tryllti lýðinn á Nasa þar sem boðið var upp á algjöra veislu. Þar var einnig belgíski rapparinn Baloji sem flutti blöndu af afrískum tónum og hip-hop.

Þá voru Dr. Spock með tónleika á Nasa með Óttarr Proppé, formann Bjartrar framtíðar, í fararbroddi. Einnig flutti hin bandaríska Julia Holter ljúfa popptónlist á Listasafni Reykjavíkur með saxófónleikara sér til halds og trausts.

Ljósmyndarinn Andri Marinó var á staðnum og tók myndir af herlegheitunum fyrir Vísi. Myndaveisluna má sjá hér fyrir neðan.