„Pitt og Jolie eru svo miklu meira en eitthvað leikarapar í Hollywood“

Á innan við sólarhring urðu þau Brad Pitt og Angelina Jolie viðfangsefni rúmlega 2,5 milljóna tísta á Twitter undir myllumerkinu #Brangelina. Hálfur netheimur virðist í ástarsorg fyrir þeirra hönd á meðan hlakkar í hinum sem vilja þannig lýsa stuðningi við Jennifer Aniston, þótt engum sögum fari af því að hún gleðjist yfir óhamingju fyrrverandi eignmanns síns.

En í hvoru liðinu sem fólk er þá virðist Brangelexit, eins og sumir kalla tíðindin, stefna í að verða skilnaður aldarinnar. Orsökin er óljós en slúðurmiðlar segja að framhjáhald Pitts með frönsku leikkonunni Marion Cottillard hafi gert útslagið.

Aðrar fregnir herma að vaxandi spenna sé í hjónabandinu vegna þess að Jolie vilji draga sig út úr Hollywood og snúa sér að stjórnmálum, en hún hefur látið til sín taka sem góðgerðasendiherra Sameinuðu þjóðanna og myndi eflaust þiggja að málstaður hennar þar fengi jafnmikla athygli og skilnaðurinn.

Stjörnudýrkun lengi fylgt manninum

Svo er það auðvitað stóra spurningin, hvað verður um börnin sex? Á skilnaðarpappírunum fer Jolie fram á fullt forræði yfir þeim, nokkuð sem Pitt er seint sagður munu samþykkja.

Það kann að virðast fáránlegt að um allan heim láti fólk sig varða skilnað ókunnugra hjóna, en á hinn bóginn hefur stjörnudýrkun lengi fylgt manninum og fékk áður útrás í aðdáun á konungbornum og guðaverum. Hollywood stjörnurnar eru guðum líkar, áferðarfallegri en venjulegt fólk og dýrkun á þeim virðist hluti af mannlegu eðli.

Þannig hafa sálfræðirannsóknir sýnt fram á að persónur á sjónvarpsskjánum eigi það til að renna saman við leikarana í hugum áhorfenda, sem geta myndað sterk tengsl við hina ímynduðu vini og fundið til raunverulegrar sorgar yfir örlögum þeirra. Þegar um ræðir einar skærustu stjörnur samtímans eins og Pitt og Jolie er því kannski ekki furða að heimsbyggðin sé í áfalli.

Hjónin nokkurs konar stofnun í Hollywood

„Brad Pitt og Angelina Jolie eru svo miklu meira en eitthvað leikarapar í Hollywood,“ sagði Álfrún Pálsdóttir ritstjóri Glamour í kvöldfréttum Stöðvar 2 en hún ræddi skilnaðinn við Sindra Sindrason.



„Þau eru nokkurs konar stofnun í Hollywood og fólk er að tala um þau séu svona eins og konungsborin hjón. Þess vegna vekur þessi skilnaður svo miklu meiri áhuga og athygli. Þetta er fólk sem byrjaði saman með látum, við munum að fólk fór í lið þar sem þetta var vonda nornin Jolie að stela manninum af þessari ástsælu bandarísku leikkonu Jennifer Aniston.“

Í gegnum árin hefur hefur ímynd Jolie og Pitt þó breyst og þau hafa náð að halda einkalífi sínu að mestu fyrir utan kastljós fjölmiðlanna en það hefur heldur betur breyst nú þegar ítarlega er fjallað um skilnað þeirra um allan heim.

„Þess vegna líka er áhuginn líka svo mikill. Þarna er fólk sem hefur svona verið með geislabaug og hann er svona að koma af. Þau eru nefnilega bara mennsk.“