Tónleikarnir breyttust í plötu

Hjómsveitin Puffin Island hefur vakið nokkra athygli undanfarið ár fyrir melódíska og afar áheyrilega popp- og rokktónlist. Sveitin hefur m.a. átt þrjú lög ofarlega á Vinsældarlista Rásar 2, þar af lagið Harrison sem náði þriðja sætinu síðasta sumar. Í vor kom frumburður sveitarinnar út, Another Day, sem hefur fengið góðar viðtökur víðast hvar. Það eru bræðurnir Egill og Skúli Jónssynir og Aron Steinþórsson sem skipa sveitina en þeir ólust allir upp í Vestubæ Reykjavíkur.

Hljómsveitin á sér frekar stuttan líftíma því boltinn byrjaði að rúlla snemma árs 2015. Þá var Skúli kominn með dágóðan bunka af lagahugmyndum sem hann vissi ekki hvað hann ætti að gera við. „Ég hafði þá samband við Aron og spurði hvort hann væri ekki til í að glamra þessar hugmyndir til og þróa áfram. Þá var markmiðið að reyna að æfa upp sett fyrir tónleika um sumarið. Í eitt skiptið sat Egill með okkur þar sem við vorum að spila lögin og honum leist svo vel á að hann sagði: Strákar mínir, við tökum þetta upp og gerum plötu.“

Hressandi lög

Þannig breyttust áform þeirra, tónleikarnir voru settir í salt og stefnan sett á upptökur segir Aron. „Vendipunkturinn í öllu ferlinu var stuttu eftir þessa yfirlýsingu Egils, þegar hann trommaði öll lögin inn á teip á einum degi. Vorið og sumarið fóru svo í að taka upp öll hin hljóðfærin og söng, fyrir utan auðvitað að semja texta við lögin. Við vorum í smá kapphlaupi við tímann því Skúli var að flytja til New York síðsumars. Eftir að Skúli flutti út fór hljóðblöndunarvinna af stað, samhliða því sem við settum eitt og eitt lag í spilun yfir veturinn.“

Fyrsta lagið til að fá spilun var Harrison. Lagið varð óvænt nokkuð mikið spilað sumarið 2015 og náði fyrir vikið þriðja sætinu á Vinsældarlista Rásar 2. Í kjölfarið fylgdu lögin Another Day og Stúlka sem bæði enduðu ofarlega á sama lista. Frumburðurinn, Another Day, kom svo lokst út síðasta vor og hef fengið góða dóma víðast hvar.

Syngja á ensku og íslensku

Sjálfir lýsa þeir tónlist sinni sem grípandi indípoppi þar sem gítarar eru áberandi, lögin oft lituð af „doo-wop“ innblásnum bakröddumog enginn skortur sé á tambúrínuhristingi. Textar plötunnar eru bæði á íslensku og ensku. Egill segir þá ekki hafa hugsað plötuna sem konsept stykki, frekar sem samansafn af fjörugum lögum. „Því vorum við ekkert að stressa okkur á að hafa texta bara á ensku eða íslensku. Við létum það bara ráðast svolítið eftir laglínum og anda laganna. Einfaldar enskar textasmíðar henta sumum lögunum á plötunni. Við höfðum líka frekar þröngan tímaramma út af því að Skúli var að fara út um haustið svo sumir textarnir voru ekki fullkláraðir fyrr en nokkrum mínútum áður en þeir voru sungnir inn.“

Nýtt efni framundan

Þar sem Skúli var búsettur í New York í sumar gátu þeir ekki fylgt plötunni almennilega eftir. Nú er hann kominn heim og sveitin hélt sína fyrstu tónleika á Nasa síðustu helgi. Þar hituðu þeir upp fyrir Nýdönsk sem var heljarinnar teiti að sögn Skúla. „Það er mikilvægt fyrir okkur að fá smá nasaþef af tónleikahaldi. Við ætlum að reyna að spila reglulega fram að Airwaves þar sem við munum koma fram. og svo er á döfinni að halda útgáfutónleika þegar platan kemur út á föstu formi. Svo erum við með nóg af nýju efni og hlökkum til að taka upp næstu plötu, sem verður eflaust ögn rokkaðri en frumburðurinn.“

Skúli og Aron skipta aðalrödd með sér á plötunni eftir því hvaða lög henta hvorum betur auk þess sem Skúli spilar á rafmagnsgítar, Egill á trommur og bassa og Aron á kassagítar. „Í dag er sveitin stærri og höfum við fengið til liðs við okkur Helga Pétur Hannesson á trommur, Gunnar Pétur Hauksson á bassa og Einar Lövdahl leikur á tambúrínu og syngur bakraddir. Svo mun tónlistarmaðurinn Jón Ólafsson, m.a. kenndur við Nýdönsk, spila annað slagið með bandinu þegar færi gefst til.“

Hlusta má á tónlist Puffin Island m.a. á Sportify og Soundcloud.