Stólarnir búnir að semja við tvo leikmenn

Tindastóll samdi við tvo sterka leikmenn í dag sem verða með þeim í Dominos-deildinni í vetur.

Þetta eru þeir Seck Pape Abdoulaye og Antonio Kurtis Hester. Pape er Senegali fæddur 1992 en Kurtis, sem er 26 ára, kemur frá Miami í Florida segir á vef Feykis.

Pape hefur leikið á Spáni undanfarin ár og þjálfari Stólanna, Jose Maria, þekkir vel til hans enda þjálfaði hann leikmanninn í þrjú ár hjá Tenerife. Hinn 205 sentimetra Pape er sagður vera alhliða leikmaður.

Hester er kraftframherji, rétt tæplega tveggja metra hár, og hefur líkt Pape, leikið á Spáni undanfarin ár. Á síðastliðnu tímabili lék hann með Miami Midnites sem leikur í FBA-deildinni.