Haukadalsá komin yfir 700 laxa

Veiðin í Haukadalsá hefur verið afar góð í sumar og þrátt fyrir að ágúst sé hálfnaður er ennþá að ganga lax í ánna.

Það kom mörgum skemmtilega á óvart sem áttu leyfi fyrri part sumars í Haukadalsá að sjá hvað það var mikið af laxi gengið í ánna og ekki skemmdi það fyrir að takan hefur verið með afbrigðum góð í allt sumar.  Staðan er þannig að áin er þegar komin yfir 700 laxa og ekkert lát virðist vera á veiðinni í ánni.  Innan um góðar smálaxagöngur hafa nokkrir stórlaxar látið sjá sig og þar á meðal einn 97 sm sem tók hjá veiðimanni í morgun.

Það hefur vaxið mikið vatnið í Haukadalsá í rigningum síðustu daga og hefur það hleypt miklu lífi í ánna og takan er ekkert síðri núna en hún var þegar fyrstu stóru göngurnar mættu.  Það hefur heilt yfir kviknað aðeins yfir veiðinni í ánum á vesturlandi en þó ekki öllum og er það mjög sérstakt í ljósi þess að loksins ringdi eftir átta til níu vikna þurrkatíð.  En líklega liggur tökuleysið líka í að þrátt fyrir að árnar hafi hækkað aðeins þarf bara aðeins meira til og haldi áfram að rigna verða örugglega fleiri veiðimenn í góðum málum á næstunni eins og þeir sem eiga daga í Haukunni.