Þjóðþekktir tónlistarmenn opna skemmtistað í húsnæði Strawberry's

Nýr skemmtistaður opnar við Lækjargötu 6a í Reykjavík um komandi helgi. Græna Herbergið er nafn staðarins en eigendur hans eru tónlistar-og athafnamennirnir Friðrik Ómar Hjörleifsson, Jógvan Hansen og Vignir Snær Vigfússon. Það þarf ekki að koma neinum á óvart að staðurinn er tónlistartengdur og mun standa fyrir lifandi uppákomum og dansvænum plötusnúðum eftir miðnætti um helgar.

„Við höfum gengið með þessa hugmynd í maganum í að verða fimm ár. Við urðum ástfangnir af þessu húsnæði þegar við fengum ábendingu um að það væri laust. Hlutirnir þróuðust hratt eftir það en eftir fjögurra mánaða þrotlausa vinnu er komið að því að opna Græna Herbergið okkar,“ segir Jógvan Hansen.

„Við höfum fundið fyrir eftirspurn eftir stað í miðbænum þar sem fólk getur sest niður, notið tónlistar og eða bara spjallað saman í góðra vina hópi og fengið sér góðan drykk.“

Staðurinn skiptist í tvær hæðir en á þeirri neðri er tónleika-og viðburðarhluti staðarins fullbúinn nýjum tækjakosti frá Hljóðfærahúsinu. 

„Við ákváðum að hafa flygil á efri hæðinni okkar sem skapar skemmtilega stemningu við barinn. Efri hæðin er mjög rúmgóð og útsýnið frábært út um stóra gluggana sem snúa að Lækjargötu sem setur fallegan svip á hæðina.”

Súlurnar fjarlægðar

Ýmiss starfsemi hefur verið í húsinu sl. ár en meðal annars má nefna kampavínsklúbbinn Strawberry’s sem fjallað hefur verið mikið um í fjölmiðlum undanfarið. Friðrik Ómar segir verkefnið hafa verið skemmtilega krefjandi þar sem húsið hafi verið þekkt fyrir Kampavínsklúbbinn Strawberry’s.

„Það gaf okkur auka kraft að gera vel í breytingum til að losa húsið við alla þessa gömlu drauga og súlur. Húsið er þekktast fyrir að hafa verið strippstaður hér áður fyrr. Við breytum ekki sögu miðbæjarins nema frá þeim degi sem við tökum lásinn af Græna Herberginu. Þetta er einstaklega fallegt hús og allir sem hafa komið í heimsókn til okkar undanfarna daga hafa verið rosalega ánægðir með þær breytingar sem við höfum gert. Það er góður andi hérna og staðsetningin eins og best verður á kosið.“

Tónlist skipar stóran hluta í lífi þeirra Friðriks, Jógvans og Vignis og það mun lita staðinn og starfsemi hans.

„Við lögðum upp með að geta boðið tónlistar-og listafólki upp á vandaðan aðbúnað til að koma fram. Við erum með allan helsta búnað á staðnum sem eykur þægindi listamanna svo um munar. Enn fremur vonumst við til að vinna náið með aðildarfélögum tónlistar-og listamanna hér á landi. Okkur langar til að byggja upp lítið samfélag í herberginu okkar,“ segir Vignir Snær.

Staðurinn opnar formlega fimmtudaginn 14. júlí kl. 16:00 en kl. 21:00 sama kvöld munu eigendurnir sjálfir stíga á stokk. Nánari upplýsingar er hægt að finna á síðu Græna Herbergisins.