Veiðimenn bíða spenntir eftir næsta straum

Í dag er lægsti straumur á flóðum og nú fer straumurinn aftur hækkandi með tilheyrandi spennu fyrir smálaxagöngum.

Stórlaxagöngurnar voru alls staðar mun betri en á sama tíma og í fyrra og fyrr á ferðinni þar að auki.  Til að gefa smá samanburð á milli ára þá hafa veiðst um 4.000 fleiri laxar á þessu ári en á sama tíma í fyrra.  Smálaxagöngurnar hafa ekki verið mjög sterkar en engu að síður hafa veiðimenn tekið eftir því að það fjölgar sífellt smálaxi í ánum en það er samt ekki kominn neinn kraftur ennþá, í það minnsta ekki það sem menn bjuggust við eftir jafn hressilegar tveggja ára laxagöngur.

Vorið í fyrra var kalt og yfirleitt hefur það verið reglan að á eftir köldum vorum komi minna af smálaxi árið eftir.  Það hefur þó líka gerst að þær komi bara seinna en það er víst ekkert hægt að spá fyrir um þetta með neinni nákvæmni svo þetta á líklega bara allt eftir að koma í ljós á næstu dögum.  Þann 21. júlí er næsta stórstreymi og bíða veiðimenn spenntir eftir því að sjá hverju það skilar í árnar.