Hratt fallandi vatn í laxveiðiánum

Vatnsstaðan í laxveiðiánum á vesturlandi fer að verða ískyggileg ef ekki fer að rigna hressilega næstu vikur.

Það er engin rigning í kortunum næstu vikurnar svo það stefnir í aðra viku þar sem vatnsmagn laxveiðiánna heldur áfram að lækka en enn sem komið er á þetta aðeins við um vestur- og norð vesturland.  Dragárnar eru sérstaklega viðkvæmar fyrir þessu ástandi og þær eru að falla hratt í vatni.  Ofan í þetta er svo spáð heitu veðri alla næstu viku sem á eftir að hita árnar upp en það gerir ástandið bara enn verra.

Það er eitt að glíma við vatnsleysi og annað að glíma við bæði vatnsleysi og hækkandi hita í ánum í þokkabót.  Þegar sólin glennir sig ofan í þetta er áskorunin við að ná laxi á land orðin ansi erfið og helst að fyrstu tveir til þrít tímarnir á morgnana og síðustu tímarnir á kvöldin gefi einhverja veiði.  Það er nóg af laxi í flestum ánum og yfirleitt ágætis göngur en það hefur þó skeð að laxinn hreinlega gangi ekki inn á meðan ástandið er eins og það er en bíði heldur þess að árnar hækki aftur í vatni og þá kemur oft hressileg gusa af laxi í árnar.  Þetta hefur oft gerst áður svo þeir sem eiga daga síðsumars í árnar á vesturlandi brosa bara yfir þessu ástandi og vona að haustrigningarnar komi bara tímanlega.