Tuttugu punda maríulax úr Víðidalsá

Það bíða sumir lengi eftir fyrsta laxinum sínum sem er í daglegu tali kallaður Maríulax og auðvitað óska flestir sér hraustlega vaxinn fisk.

Það reynist ekki öllum vandalaust að ná í Maríulaxinn en þegar augnablikið gerist og laxinn tekur fluguna og baráttan hefst, þá er athygli og einbeitning veiðimannsins öll á einu markmiði.  Að ná laxinum á land.  Stundum þarf nokkrar tilraunir og baráttur þar sem laxinn hefur betur en þegar veiðimaðurinn nær að renna laxi í háfinn í fyrsta skipti er óhætt að segja að spennufall taki yfir hug og líkama.

En hvað gerist þegar Maríulaxinn þinn er 20 punda tröll?  Þetta fékk Björn Halldór Helgason að reyna í Víðidalsá þegar hann landaði einmitt 20 punda fiski í Harðeyrarstreng en sá veiðistaður er einmitt þekktur fyrir stórlaxa sem þar veiðast.  Eins og sést á myndinni er laxinn enginn smásmíð og ánægja veiðimannsins augljós með þetta ferlíki í höndunum.  Veiðivísir óskar Birni til hamingju með Maríulaxinn og velfarnaðar í veiðiferðum framtíðar.