Bókavörður ferðast út í geiminn

Þetta myndband segir söguna af manni sem starfar sem bókavörður á bókasafni. Hann er svolítið örvæntingarfullur og myndi gera hvað sem er til að öðlast frægð og frama. Hann bregður því á það ráð að fljúga með bókasafnið sem hann starfar á til Mars. Myndbandið er í raun og veru ferðalagið hans í gegnum þetta. Leikstjórinn er Baldvin Albertsson. Þetta er tekið upp í Norræna húsinu á bókasafninu þar. „Ógeðslega flott bókasafn,“ segir Helgi Kristjánsson, trommari sveitarinnar One Week Wonder, sem sendir frá sér sitt fyrsta myndband í kvöld við lagið Mars og mun halda upp á það með pomp og prakt í Bíói Paradís.

Í myndbandinu kemur fyrir ansi sérstakur geimbúningur, hver er saga hans?

„Þessi geimbúningur er kínverskur háloftabúningur fyrir herþotuflugmenn sem fljúga í mikilli hæð og þurfa að vera í sérstökum þrýstingsbúningi. Þetta er gamall búningur sem við létum flytja inn sérstaklega fyrir myndbandið, keyptur á eBay. Það var brjálæðislega mikil fúkkalykt af honum þegar hann kom – og er enn.“

Bandið er frekar nýlegt tríó skipað auk Helga þeim Árna Guðjónssyni og Magnúsi Benedikt Sigurðssyni. Þeir segjast vera undir áhrifum frá Pink Floyd, Air og ítalska tónskáldinu Ennio Morricone sem er hvað þekktastur fyrir að gæða spagettívestra Sergio Leone lífi með epískri tónlist sinni.

„Þetta er splunkunýtt band. Við höfum ekkert verið sérstaklega virkir. Við sem sagt bjuggum saman í Berlín og tókum upp tíu lög þar og ætlum að gefa fimm þeirra út núna í ágúst sem EP-plötu og svo sjáum við hvað gerist í framhaldi af því. Nafnið One Week Wonder kom þannig til að Árni Guðjónsson og Magnús Benedikt ætluðu að stofna hljómsveit sem myndi senda frá sér einn smell í viku og þess vegna varð nafnið One Week Wonder og það festist við bandið. Við fórum svo að pæla í allt öðrum hlutum.“

Myndbandið verður frumsýnt í kvöld klukkan 21.30 í Bíói Paradís og auðvitað mun One Week Wonder­ taka lagið og Valborg Ólafsdóttir, Voice-þátttakandi, mun einnig koma fram.