Gæsa­húðar­mynd­band: Sjáðu fagnaðar­lætin í leiks­lok frá vara­manna­bekk Ís­lands

Um fátt er meira rætt á Íslandi í dag en frækinn sigur íslenska karlalandsliðsins á Englendingum á EM í gærkvöldi. Fögnuður leikmanna sem og þjóðarinnar var einlægur þegar flautað var til leiksloka og hafa fjölmörg myndbönd birst á samfélagsmiðlum síðasta hálfa sólarhringinn eða svo af fagnaðarlátum, bæði í Frakklandi og hér heima á Íslandi.

Myndbandið hér að neðan er hins vegar nokkuð einstakt enda er það tekið upp frá varamannabekk íslenska landsliðsins undir leikslok. Gleðin er ósvikin þegar varamenn landsliðsins, þjálfarateymi og starfsmenn hlaupa inn á völlinn og svo í átt til stuðningsmannanna en í myndbandinu sést meðal annars þegar Heimir Hallgrímsson landsliðsþjálfari hleypur í fangið á Sigga dúllu búningastjóra landsliðsins og þeir félagar faðmast innilega.

Hannes Þór Halldórsson markvörður íslenska landsliðsins deildi myndbandinu á Facebook-síðu sinni í dag og það má sjá hér að neðan.