Ytri Rangá komin í 409 laxa

Ytri Rangá sló öll með með 255 laxa opnunarholli og að er ennþá glimrandi fín veiði í ánni.

Það er óhætt að segja að það sé góður gangur í veiðinni þegar bara 6 dagar eru liðnir af tímabilinu en áin stendur í 409 löxum og það er mikið af laxi að ganga.  Samkvæmt skráningum í veiðibókina er um 80% stórlaxa hlutfall sem hefur samkvæmt okkar heimildum aldrei verið svo hátt í Ytri Rangá áður.  Það er líka gaman að heyra frá veiðimönnum sem hafa verið við ánna fyrstu dagana að túpuveiðin er að minnka, í það minnsta eru túpurnar að minnka, og veiðimenn eru í auknum mæli farnir að taka laxa á "hitch".

Veiðimaðurinn góðkunni Nils Folmer Jorgensen landaði til að mynda 102 sm laxi úr Kvíslapollum á Kolskegg hitchtúpu en þetta er stærsti laxinn úr Rangánum í sumar.  Baráttan stóð yfir í 45 mínútur og gaf laxinn ekkert eftir allann tímann.  Það er mikið af laxi í ánni og á þessari einu vakt náði Nils sjö löxum en missti tvo og allt var þetta stórlax með 95 og 102 sm stærstum.