Á sama tíma og beðið er eftir því að laxinn komi stór og tökuglaður úr sjó eru laxaseiðin að fara úr ánum og til sjávar. Laxaseiðin eru í ánum í 3-5 ár og þegar þau hafa náð réttum þroska og stærð undirbúa þau sig fyrir sjávardvöl með því að fara í göngubúning (smolta). Í veðurbreytingunum í vikunni hafa skilyrði fyrir sjógöngu laxaseiðanna verið afskaplega hagstæð enda sést það vel t.d. í Elliðaánum en þar er seiðaskilja þar sem seiðin eru talin og örmerkt. Þar fylltust tunnurnar um leið og áin hækkaði í rigningunum og seiðin fóru að leita leiðar sinnar niður ánna en eru gripinn í tunnurnar.
Þar tekur á móti þeim Jóhannes Sturlaugsson sem hefur veg og vanda að því að telja og örmerkja seiðin. Þetta er feyknamikil vinna enda merkir Jóhannes um það bil 16-25% af allri göngunni árlega. Þetta skilar gífurlega mikilvægum upplýsingum um stöðu stofnsins í ánum því með þessu má sjá stöðu í endurheimtum á laxinum. Jóhannes hefur einnig umsjón með rannsóknum á urriðastofninum á Þingvöllum og hefur þar árlega sýningu á ísaldarurriðanum við bakka Öxará.
Það var ekki annað að sjá en að laxaseiðin færu vel haldin til sjávar og það er vonandi að sjórinn taki vel á móti þeim og skili sem mestu af þeim til baka að ári. Við erum svo að sjá næstu vikur og mánuði hvernig skyldmenni þeirra höfðu það í vetrardvölinni í sjónum en þau hópast nú að veiðiánum, klár til að taka agn veiðimanna.
