Lax-Á framlengir samning í Blöndu

Karl Lúðvíksson skrifar 12. maí 2016 15:51

Blanda hefur um árabil verið ein aflahæsta veiðiá landsins og hefur eftirspurn eftir leyfum í hana aukist ár frá ári.

Það má til dæmis vel sjá að það eru margir sem sækjast eftir því að komast í Blöndu eftir frábært sumar í fyrra þegar 4829 laxar veiddust í ánni. Það er Lax-Á sem hefur verið leigutakinn á Blöndu undanfarin ár og verður áfram því félagið framlengdi nýlega samning sinn við veiðifélagið um fimm ár til viðbótar.

Í tilkynningu frá félaginu segir: "Stangveiðifélagið Lax-Á hefur nýlega framlengt samning sinn við veiðifélag Blöndu og Svartár og mun því sjá um sölu veiðileyfa á ársvæðunum næstu fimm ár. Samstarf Lax-á og veiðifélags Blöndu og Svartár nær allt aftur að aldamótum og þökkum við trausta og góða samvinnu í gegn um árin. Blanda hefur dafnað sérlega vel á tímbilinu og var metveiði í ánni sumarið 2015 eins og menn muna.

Við hjá Lax-Á munum áfram hlúa að ánni eins og best verður á kosið og höfum stigið fyrstu skrefin nú í sumar með örlítið hertari veiðireglum. Við erum ákaflega ánægð með að fá að bjóða veiðimenn áfram velkomna á bakka Blöndu og Svartár sem eru eitt af betri veiðsvæðum á landinu."