Rúnar innsiglaði sigur Sundsvall

Rúnar Már Sigurjónsson fer vel af stað í sænsku úrvalsdeildinni en hann skoraði sitt annað mark á tímabilinu er hann skoraði þriðja og síðasta mark sinna manna í Sundsvall í 3-1 sigri liðsins á Örebro.

Rúnar Már hefur því skorað tvívegis í fyrstu fjórum leikjum sínum í sænsku úrvalsdeildinni en Sundsvall er nú í fimmta sæti deildarinnar með sjö stig.

Markið skoraði hann á 59. mínútu en Rúnar var í byrjunarliði Sundsvall í kvöld, líkt og Kristinn Steindórsson sem var tekinn af velli á 66. mínútu.

Viðar Örn Kjartansson kom þá inn á sem varamaður í liði Malmö sem vann nauman 1-0 sigur á Elfsborg í kvöld. Markus Rosenberg skoraði eina mark leiksins á 78. mínútu.

Viðar Örn hefur verið varamaður í síðustu tveimur leikjum sínum en hann á enn eftir að skora deildarmark fyrir Malmö. Malmö er í sjöunda sæti sænsku deildarinnar með sex stig.