Kobe ekki með og Lakers vann aftur | Myndbönd

LA Lakers náði að fylgja eftir sigrinum á NBA-meisturunum í Golden State Warriors á sunnudagskvöld með því að leggja Orlando Magic að velli í nótt, 107-98.

Þetta var í aðeins annað skipti á þessu ári sem Lakers tekst að vinna tvo leiki í röð  en liðið er engu að síður neðst í vesturdeildinni með fjórtán sigra en 51 tap.

Kobe Bryant lék ekki með Lakers vegna meiðsla en hann hefur misst af fjórum af síðustu fimm leikjum liðsins. Vonir standa þó til að hann geti spilað með Lakers gegn Cleveland á morgun.

D'Angelo Russell skoraði 27 stig fyrir Lakers og Jordan Clarkson var með 24 stig. Julius Randle bætti við 23 stigum sem er persónulegt met en þetta er í fyrsta sinn sem þessir þrír ungu leikmenn ná allir yfir 20 stig í sama leiknum.

Orlando hefur nú tapað þremur leikjum í röð en stigahæstur í liðinu var Victor Oladipo með 26 stig.

San Antonio komst aftur á sigurbraut eftir óvænt tap gegn Indiana í fyrrakvöld er liðið vann Minnesota, 116-91. LaMarcus Aldridge var með 29 stig fyrir San Antonio en sigur liðsins var aldrei í hættu.

San Antonio er í öðru sæti vesturdeildarinnar með 54 sigra, tveimur á eftir toppliði Golden State. Þessi tvö lið eru þau einu sem hafa þegar tryggt sér sæti í úrslitakeppninni í vor.

Úrslit næturinnar:

Toronto - Brooklyn 104-99

Minnesota - San Antonio 91-116

Denver - New York 110-94

Utah - Atlanta 84-91

Portland - Washington 116-109

LA Lakers - Orlando 107-98