Gurley fékk eins leiks bann fyrir að slá til Helga Más

Anthony Isaiah Gurley, leikmaður Tindastóls, var í dag dæmdur í eins leiks bann af aga- og úrskurðarnefnd KKÍ.

Gurley sló til KR-ingsins Helga Más Magnússonar í leik liðanna á dögunum.

Atvikið fór fram hjá dómurum leiksins en ekki Finni Frey Stefánssyni, þjálfara KR, sem trylltist. Sjá má atvikið og upphlaupið hjá Finni hér að ofan. Gurley er dæmdur í bann út frá þessum myndbandsupptökum.

Bandaríkjamaðurinn getur því ekki leikið með Stólunum annað kvöld er liðið sækir FSu heim í lokaumferð Dominos-deild karla.

Gurley verður aftur á móti klár í bátana er úrslitakeppnin hefst.