Ísterta sem sigrar allar aðrar kökur

Thelma er tveggja barna móðir sem hefur gaman af bakstri og deilir uppskriftum af kræsingum sínum á vefsíðunni freistingarthelmu.blogspot.com. Nýlega setti hún saman þessa sælgætisísköku og segir Thelma um kökuna:

„Ég býð alltaf upp á heimatilbúinn ís á jólum, áramótum og páskum. Það er bara eitthvað svo hátíðlegt við heimatilbúinn ís og ég geri hann yfirleitt aldrei við nein önnur tækifæri. Mér finnst gaman að prófa nýjan ís í hvert skipti og auðvelt er að leika sér með það sem maður blandar saman við ísblönduna. Þessi ís vakti mikla lukku hér hjá fjölskyldunni og sérstaklega hjá yngri kynslóðinni. Það er ekki nauðsynlegt að skreyta hann með ísformum en það gerir hann alveg einstaklega skemmtilegan.“ Þessi ætti að slá í gegn í hvaða boði sem er, hvort sem er hjá ungum eða öldnum.

Sælgætisís Nóa

6 egg

6 msk. sykur

120 g púðursykur

4 tsk. vanilludropar

150 g tromp

100 g dökkt konsum-súkkulaði

150 g lakkrískurl

7 dl rjómi

Skraut

100 g súkkulaðiperlur

4-5 stk. ísform

2½ dl rjómi

Aðferð

Þeytið eggjarauður og sykur saman þar til blandan verður ljós og létt.

Blandið púðursykri varlega saman við með sleif.

Þeytið rjómann og blandið honum saman við með sleif þar til allt hefur blandast vel saman.

Grófsaxið súkkulaði og tromp og blandið því saman við ísblönduna ásamt lakkrískurlinu. Blandið því næst vanilludropunum saman við.

Þeir sem vilja geta þeytt eggjahvíturnar og blandað saman við ísinn svo það verði meira úr honum eða geymt þær til annarra nota.

Hellið ísblöndunni í hringlaga kökuform og frystið í a.m.k. 5 klukkustundir.

Takið ísinn úr kökuforminu og setjið á disk.

Skerið ísformin í tvennt og raðið þeim í kringum ískökuna.

Þeytið rjóma og sprautið honum ofan í hvert ísform fyrir sig.

Skreytið með súkkulaðiperlum. Ísinn geymist í frysti í allt að 3 mánuði.