Handtaka ósamvinnuþýða flóttamenn

Flóttamenn sem sýna ungverskum yfirvöldum ekki fullan samstarfsvilja mega eiga von á því að verða handteknir frá og með næstu viku. Frá þessu greindi forsætisráðherra landsins, Viktor Orbán, í gær.

„Þegar maður tekur mið af því að við berjumst við uppreisn flóttamanna sem koma ólöglega inn í landið hefur lögregla staðið sig merkilega vel og tekið á vandanum án þess að beita valdi,“ sagði hann.

Yfirlýsing Orbán kom í kjölfar birtingar myndbands sem austurrískur sjálfboðaliði tók í flóttamannabúðum í ungverska bænum Röszke, en þangað koma þúsundir flóttamanna á degi hverjum. Myndbandið sýnir æstan hóp flóttamanna innan girðingar að slást um poka með samlokum sem grímuklæddir, vígbúnir lögreglumenn köstuðu inn fyrir girðinguna.

Lögregla í Ungverjalandi segir rannsókn hafna á málinu. Í yfirlýsingu Human Rights Watch eru aðstæður í flóttamannabúðunum í Röszke sagðar ólíðandi.