Luke Shaw fótbrotnaði í Eindhoven

Luke Shaw, vinstri bakvörður Manchester United, varð fyrir hryllilegum meiðslum í leik liðsins gegn PSV Eindhoven í Meistaradeildinni í kvöld.

Shaw var tæklaður af Hector Moreno, leikmanni PSV, í vítateig heimamanna og fótbrotnaði afar illa. Allt tiltækt sjúkralið á vellinum var kallað til hans um leið.

Það tók tæpar tíu mínútur að gera að Shaw á vellinum og gera hann tilbúinn til brottflutning á sjúkrahús, en nokkuð ljóst er að hann spilar ekki meira á þessari leiktíð.

Þetta eru skelfileg tíðindi fyrir United og auðvitað Shaw sem hefur farið frábærlega af stað á þessari leiktíð.

Fylgst er með leiknum í beinni textalýsingu hér.