Getur tekið á móti 500 þúsund flóttamönnum á ári

Sigmar Gabriel, varakanslari Þýskalands, segir að Þýskaland geti tekið við 500 þúsund nýjum flóttamönnum á hverju ári næstu árin.

Gabriel lét orðin falla í samtali við sjónvarpsstöðina ZDF í morgun.

Þýsk yfirvöld gera ráð fyrir að um 800 þúsund flóttamenn komi til landsins á þessu ári. Gangi það eftir er það fjórföldun frá fyrra ári.

Í viðtalinu sagði Gabriel ekki nokkurn vafa á því að Þýskaland geti tekið á móti fleirum þar sem Þýskaland er „efnahagslega öflugt ríki“.

Hann segir þó að önnur ríki verði einnig að gera meira til að takast megi á við aukinn straum flóttafólks til álfunnar.