Fundu 50 lík í lest skips

Starfsmenn Landhelgisgæslu Svíþjóðar fundu 50 lík í lest skips við strendur Líbýu í dag. 430 flóttamönnum var bjargað af skipinu. Talsmaður ítölsu strandgæslunnar segir að umrædd björgunaraðgerð sé ein af tíu sem hafi farið fram undan ströndum Líbýu í dag.

Ekki liggur fyrir hvernig fólkið lét lífið, en fyrr í mánuðinum fundu starfsmenn ítölsku strandgæslunnar 49 lík í lest annars skips. Þar hafði fólkið kafnað eftir að allt of mörgum hefði verið komið fyrir í lestinni. Smyglarar bönnuðu fólkinu að yfirgefa lestina, þrátt fyrir súrefnisleysið.

Samkvæmt BBC hafa rúmlega tvö þúsund flóttamenn látið lífið á leiðinni yfir Miðjarðarhafið, það sem af er þessu ári. Mörg þúsund hefur verið bjargað af hinum ýmsu fleyjum sem smyglarar notast við.