Kuldinn hægir á laxinum

Þrátt fyrir að það sé að líða að lokum júlí minnir veðrið síðustu dagana frekar á maí og júní.

Það hefur ekkert farið framhjá neinum sem hefur staðið við bakkann síðustu daga og vikur að það er bara drullukalt og vatnshitinn víða fer ekki yfir 7-8 gráður. Kalt vatnið virðist hægja á laxinum upp ánna og efri svæðin í sumum ánum eru hreinlega ekki kominn inn vegna þessa. Það er ekki spáð neinum sérstökum hlýindum svo það má reikna með að þetta ástand vari eitthvað áfram en upp fer hann að lokum, það er nokkuð ljóst.

Miklar göngur hafa verið upp á síðkastið á vestur og suðurlandi sem gerir það að verkum að þrátt fyrir slæmt veður er veiðin ennþá mjög góð og það verður áhugavert að sjá stöðuna á morgun á nýjum vikulista frá Landssambandi Veiðifélaga en nú þegar hafa Norðurá, Blanda og Miðfjarðará farið yfir 1000 og líklega Þverá líka en ekki hafa fengist staðfestar tölur þaðan. Langá og Rangárnar koma rétt á hæla þeirra en Langá fer líklega yfir 1000 laxa í því holli sem er nú við veiðar.