Þingmaður og borgarstjóri eru druslur

Strætóskýli höfuðborgarsvæðisins eru núna merkt druslum á öllum aldri og af hinum ýmsu sviðum þjóðfélagsins. Öll plakötin Druslugöngunnar má sjá með því að smella hér. Druslugangan fer fram þann 25. júlí og verður lagt af stað frá Hallgrímskirkju kl. 14.00.

Meðal þeirra sem prýða plakötin eru Björt Ólafsdóttir, þingmaður, Dagur B. Eggertsson, borgarstjóri, Magga Stína, tónlistarmaður og Arnar Freyr Frostason, tónlistarmaður.

Með þessu vilja skipuleggjendur Druslugöngunnar hvetja fólk til að mæta í gönguna þann 25. júlí nk. og taka afstöðu gegn kynferðisofbeldi. Fólkið sem mætir í Druslugönguna er þverskurður íslensks samfélags og er það boðskapur plakata Druslugöngunnar í ár. Í hana mætir fólk af öllum kynjum, á öllum aldri og fólk með mjög ólíkar stjórnmálaskoðanir og sýna í verki samstöðu með þolendum kynferðisofbeldis. Þess vegna eru allir þeir sem leggja málefninu lið druslur segir í tilkynningu frá aðstandendum hátíðarinnar.

Nú þegar hafa yfir 3000 manns boðað komu sína í Druslugönguna á Facebook viðburði göngunnar, og er von skipuleggjanda göngunnar að slá öll met í ár en markið er sett á a.m.k. 20.000 manns. Yfirlýst markmið göngunnar er að færa ábyrgð kynferðisglæpa af þolendum og yfir á gerendur og ítreka að klæðnaður, hegðun eða fas þolenda er aldrei afsökun fyrir slíkum glæpum.  

Druslugangan hefur fest rætur sínar sem árviss viðburður í Reykjavík og verið í forystu í baráttunni fyrir breyttu hugarfari og orðræðu um kynferðisofbeldi. Druslugangan hefur dregið fram í dagsljósið það sem okkur sem samfélagi dylst allt of oft eða þorum ekki að horfast í augu við. Fjöldi fólks hefur skilað skömminni í aðdraganda göngunar og í kjölfar hennar, deilt sögum sínum og orðið öðrum innblástur. 

Síðustu vikur og mánuði hefur ótrúlegur fjöldi einstaklinga stigið fram og skilað skömminni, í eitt skipti fyrir öll. Fókusinn er ekki lengur á þolendur heldur er loksins búið að beina kastljósinu á gerendur. Sú bylting hefur hreyft við öllu samfélaginu. Einkennisorð göngunar í ár eru „Ég mun ekki þegja“ og „Ég mun standa með þér“.  

Druslugangan leggur af stað klukkan 14.00 þann 25. júlí frá Hallgrímskirkju. Gengið verður í átt að Austurvelli þar sem við taka ræðuhöld og tónleikar. Friðrik Dór, Úlfur Úlfur, Boogie Trouble og Mammút munu meðal annars spila og verða kynnar og ræðuhaldarar kynntir til leiks þegar nær dregur göngu.