Wade orðaður við Clippers og Knicks

Eftir mörg góð ár hjá Miami Heat hrundi liðið með brotthvarfi LeBron James og komst ekki í úrslitakeppnina í ár.

Dwyane Wade er orðinn 33 ára gamall og er farinn að skipuleggja síðustu árin í boltanum. Hann fórnaði stórum samningum á besta aldri svo liðið gæti fengið LeBron og Chris Bosh. Það skilaði titlum.

Nú vill hann aftur á móti fá vel útborgað á lokametrunum. Hann gæti farið frá Miami í sumar og er hann sterklega orðaður við LA Clippers og NY Knicks þessa dagana.

Hann gæti þó verið eitt ár í viðbót hjá Miami þar sem hann er með öruggar 16 milljónir dollara fyrir næsta vetur.