Á Betlehemsvöllum

Á Betlehemsvöllum þar birtist um nótt,

hinn blessaði engill, sem boðar oss skjótt:

Nú fagnið og gleðjist því frelsarinn er

oss fæddur í heiminn á völlunum hér.

Í lágreista jötu hér lausnarinn fyrr

var lagður í hálminn við fjárhússins dyr.

Þar stjarnan á himninum blikaði blítt,

og birtuna lagði um andlit hans frítt.

Og dýrin á völlunum vaka þá nótt,

en vindurinn sefur og allt er svo hljótt.

Nú barnið í jötunni brosir þér við,

og blessun því fylgir, það gefur þér frið.

Ó ver hjá mer Jesús, ó veit mér þá bón,

að vernda mig ætíð svo bíði ei tjón,

og blessa þú ávallt öll börnin þín smá,

sem biðja þess heitast að lifa þér hjá.



Texti: Sigurður Björnsson. (1. erindi frumsamið. 2.-4. erindi þýtt úr ensku - Away in a Manger). Lag: James Murray