Endurskoðun er nauðsynleg

Bæjarstjórn Hafnarfjarðar hefur sent sjávarútvegsráðherra og ríkisstjórninni áskorun um að hætta við flutning Fiskistofu úr sveitarfélaginu til Akureyrar. Fréttablaðið greindi frá því í gær að á bæjarstjórnarfundi í vikunni hefðu verið lagðar fram tölur um þróun atvinnuleysis og íbúafjölda þessara tveggja bæjarfélaga frá árinu 2007. Þannig var atvinnuleysi í Hafnarfirði í fyrra 4,7 prósent en 3,5 prósent á Akureyri. Þá fjölgaði íbúum á Akureyri um sjö prósent á sama tíma og íbúum á landsvísu fjölgaði um sex prósent að meðaltali.

„Þannig að það er ekki hægt að færa fyrir því rök að flutningur Fiskistofu sé til þess að sporna við fækkun íbúa á Akureyri,“ segir Haraldur L. Haraldsson bæjarstjóri og bendir á að frá árinu 2007 hafi stöðugildum hjá ríkinu fækkað í Hafnarfirði úr 622 í 495 eða um tuttugu prósent. Á sama tíma hefur ríkisstörfum á Akureyri aðeins fækkað um fimm prósent, úr 1.062 í 1.005. Samt sem áður búa um tíu þúsund fleiri íbúar í Hafnarfirði heldur en á Akureyri.

Áður hefur verið greint frá andstöðu allra starfsmanna Fiskistofu við flutninginn, utan fiskistofustjóra. Útlit er fyrir að aðeins einn starfsmaður, sem er einmitt fiskistofustjórinn, ætli sér að flytja með stofnuninni. Og það þrátt fyrir gylliboð um þriggja milljóna eingreiðslu rífi menn sig upp með rótum og flytji sig norður yfir heiðar. Fyrst var tilkynnt um flutninginn á ríkisstjórnarfundi í júní. Síðan þá hafa engir nákvæmir útreikningar á kostnaði, hagræði eða faglegum ávinningi flutningsins komið fram af hálfu sjávarútvegsráðherra. Ekki er einu sinni gert ráð fyrir honum á fjárlögum, svo skammt er horft fram á veginn í sjávarútvegsráðuneytinu.

Í málsvörn sinni fyrir flutningnum benda framsóknarmenn bæði á stjórnarsáttmálann sem og byggðaáætlun þar sem vissulega stendur svart á hvítu að stefnan sé að fjölga störfum á landsbyggðinni. Það orkar hins vegar tvímælis að á meðan verið er að ráðast í nauðsynlegan en blóðugan niðurskurð í samræmi við fyrirætlanir um aukinn aga í ríkisfjármálum og niðurgreiðslu skuldahala ríkissjóðs að ætla sér að flytja stofnun fyrir 200 milljónir hið minnsta, án nokkurs rökstuðnings annars en að það samrýmist óljósri byggðastefnu. Byggðastefnu sem gengur ekki upp eins og bæjarstjórn Hafnarfjarðar hefur bent á. Bæjarstjórinn nefnir á að svo virðist sem þessar tölur hafi ekki verið skoðaðar áður en ákveðið var að flytja stofnunina um stað. „Ef menn eru að tala um að byggðasjónarmið eigi að ráða þá finnst mér ekki hafa verið sýnt fram á það með málefnalegum rökum,“ segir Haraldur.

Byggðasjónarmið geta vel átt við og viðleitni til að fjölga opinberum störfum frekar á landsbyggðinni en á höfuðborgarsvæðinu er örugglega góðra gjalda verð. En slík sjónarmið hljóta, ef byggðastefnan er lesin til samræmis við ríkisstjórnarsáttmálann, að þurfa að stuðla að hagræði og skilvirkni. Það er óásættanlegt á sama tíma og fjárskorti er borið við í löggæslu- og dómskerfinu, heilbrigðiskerfinu og velferðarkerfinu að hægt sé að eyða minnst 200 milljónum í fullkomlega órökstuddan flutning á stofnun, þar sem í ofanálag er ljóst að sú þekking og reynsla sem fyrirfinnst innan stofnunarinnar mun öll glatast þar sem starfsfólkið mun ekki fylgja með.