Nokkrir punktar fyrir jógaiðkendur

Sólveig Þórarinsdóttir jógakennari bendir á nokkra punkta sem gott er að hafa á hreinu fyrir þá sem hafa áhuga á að byrja stunda jóga.

Eini staðalbúnaðurinn sem þú ættir að huga að er hæfilega þunn dýna, sér í lagi ef þú ætlar að stunda jóga heima. Þú getur fengið lánsdýnur í allflestum tímum en þá viltu hafa meðferðis stórt handklæði, sérstaklega ef þú ætlar að stunda heitt jóga. Þetta gerir þú til að tryggja eigið hreinlæti.

Ef þú ert byrjandi getur þú ýmist valið um að fara í einkatíma, opna tíma í jóga- og/eða líkamsræktarstöðvum en gættu að því að velja tíma sem eru ætlaðir fyrir byrjendur.

Það er svekkjandi að villast inn í tíma þar sem ekki er sérstaklega hugað að þeim sem eru að feta sín fyrstu skref.

Vertu þó óhrædd/ur við að prófa ólíka tíma og kennara og gefa þér nokkur skipti til þess að aðlagast. Þessi sería sem kynnt er í bókinni hentar afar vel fyrir byrjendur þar sem þetta eru kyrrstöðuæfingar og því auðveldara að stýra æfingunni miðað við þína getu.