Íslendingar óðir í Timberlake

Mikill fjöldi aðdáenda Justins Timberlake á Íslandi skráði sig í erlendan aðdáendaklúbb kappans í gær.

Þar með geta þeir keypt miða á tónleika hans í Kórnum 24. ágúst í forsölu tveimur dögum á undan öðrum tónleikagestum.

Koma popparans til landsins hefur vakið mikla athygli á meðal fjölmargra aðdáenda hans. Á opinberri Facebook-síðu hans hafði í gærkvöldi tæplega þrjú þúsund manns líkað við stöðuuppfærslu um að hann ætlaði að stíga á svið í Reykjavík í fyrsta sinn. Þar var kvenþjóðin í meirihluta, sem kemur ekki á óvart enda Timberlake bæði sjóðheitur tónlistarmaður og leikari.