Það kemur í ljós rúmlega ellefu í dag hverjir verða mótherjar ensku liðanna í 16 liða úrslitum Meistaradeildar Evrópu í fótbolta, en þá verður dregið til fyrstu umferðar útsláttarkeppninnar.
Þrjú ensk lið verða í pottinum á eftir; Chelsea, Manchester City og Arsenal. Liverpool verður í pottinum þegar dregið verður til 32 liða úrslita Evrópudeildarinnar síðar í dag, en lærisveinum Brendans Rodgers mistókst að komast upp úr sínum riðli.
Chelsea er eina enska liðið sem hafnaði í fyrsta sæti síns riðils og sleppur því við að mæta stórliðum á borð við Real Madrid, Bayern München og Barcelona í 16 liða úrslitum. Arsenal og City geta aftur á móti dregist gegn Evrópumeisturum Real.
Lið sem voru saman í riðli og lið frá sama landi geta ekki mæst í 16 liða úrslitunum sem hefjast eftir áramót.
Fylgst verður með drættinum í beinni útsendingu hér á Vísi.
Liðin sem unnu sinn riðil: Atlético Madrid, Real Madrid, Monaco, Dortmund, Bayern München, Barcelona, Chelsea, Porto.
Liðin sem höfnuðu í öðru sæti: Juventus, Basel, Bayer Leverkusen, Arsenal, Man City, PSG, Schalke, Shaktar Donetsk.
Hverjir verða mótherjar ensku liðanna í Meistaradeildinni?
