Tvö hundruð miðar seldust upp á fjórtán mínútum

„Nú erum við byrjuð að bóka fullt af böndum. Við munum segja frá þeim í enda nóvember,“ segir Friðrik Ólafsson, einn af skipuleggjendum tónlistarhátíðarinnar Secret Solstice í viðtali við Ósk og Sverri í morgunþætti FM957.

Hátíðin verður haldin 19. til 21. júní á næsta ári en miðasala er hafin. 

„Við settum tvö hundruð forsölumiða í sölu núna og þeir seldust upp á fjórtán mínútum,“ segir Friðrik og bætir við að hátíðin verði svipuð og í fyrra. Þá verða fleiri rokk- og poppsveitir sem troða upp þó danstónlistin verði í forgrunni líkt og í fyrra.

Secret Solstice-hátíðin var haldin í fyrsta sinn í fyrra og komu listamenn á borð við Massive Attack, Disclosure, Banks, Schoolboy Q og Wookid fram ásamt mörgum, íslenskum sveitum. Um átta þúsund manns sóttu hátíðin í fyrra.