Kristinn skoraði í öruggum sigri

Kristinn Steindórsson skoraði þriðja mark Halmstad í 4-0 sigri á Falkenberg í sænsku úrvalsdeildinni í fótbolta í kvöld.

Halmstad var 2-0 yfir í hálfleik en Kristinn bætti þriðja markinu við á fjórðu mínútu seinni hálfleiks.

Guðjón Baldvinsson sat allan leikinn á bekknum hjá Halmstad sem er með 39 stig í 10. sæti deildarinnar. Falkenberg er í 13. sæti með 32 stig.

Arnór Yngvi Traustason lék allan leikinn fyrir Norrköping sem lagði Örebro 2-0 á heimavelli. Þetta var mjög mikilvægur sigur Norrköping í fallbaráttunni því liðið er nú með 35 stig í ellefta sæti deildarinnar. Örebro er í sjötta sæti með 43 stig.

Í norsku úrvalsdeildinni lék Birkir Már Sævarsson allan leikinn fyrir Brann sem tapaði 2-1 á útivelli fyrir Bodö/Glimt.

Brann er í næst neðsta sæti deildarinnar með 23 stig en Bodö/Glimt er í 13. sæti með 32 stig og ekki lengur í fallbaráttu.