Benzema og Ronaldo skoruðu í sigri Real

Karim Benzema og Cristiano Ronaldo skoruðu mörk Real Madrid sem vann 2-0 heimasigur á nýliðum Cordoba í 1. umferð spænsku úrvalsdeildarinnar í fótbolta í kvöld.

Cordoba var að spila sinn fyrsta leik í efstu deild í 43 tímabil og áttu nýliðarnir að flestra mati ekki von á góðu á Bernabeu í kvöld.

Fremstu sex hjá Real Madrid í kvöld voru þeir James Rodríguez, Toni Kroos, Luka Modric, Cristiano Ronaldo, Gareth Bale og svo Karim Benzema.

Karim Benzema skoraði fyrra markið á 30. mínútu með skalla eftir hornspyrnu frá Toni Kroos. Cordoba fékk frábært færi til að jafna rétt fyrir hálfleik en tókst ekki að jafna metin.

Cristiano Ronaldo skoraði seinna markið á 90. mínútu með þrumuskoti fyrir utan vítateig. Ronaldo var búinn að reyna mikið og skoraði rétt áður en það mark var réttilega dæmt af vegna rangstöðu.