Hljómsveitin Oasis í nýju ljósi

Afar sjaldgæfar og áður óheyrðar prufuupptökur verða að finna í nýrri endurútgáfu plötunnar, (What's The Story) Morning Glory? sem hljómsveitin Oasis sendi upphaflega frá sér árið 1995, en gert er ráð fyrir að nýja útgáfan komi út í september.

Platan, (What's The Story) Morning Glory? sem kom út í október árið 1995 og hefur selst í um 22 milljónum eintaka á heimsvísu, verður endurútgefin sem hluti af Chasing The Sun útgáfunni, en fyrsta plata Oasis, Definitely Maybe kom út undir sama heiti eða sömu útgáfu fyrr á árinu og vakti mikla lukku.

Á nýju útgáfu plötunnar eru lögin endurhljómblönduð og masteruð upp á nýtt. Þá verður þar einnig að finna áður óheyrðar prufuupptökur og upptökur frá tónleikum. Áður óséðar ljósmyndir verða einnig að finna í plötubæklingnum og í plötuumslagi. Nýja platan kemur út á formi geisladisks og á vínyl.

(What's The Story) Morning Glory? er önnur plata Oasis en sveitin hefur alls sent frá sér sjö hljóðversplötur og er (What's The Story) Morning Glory? ein sú allra vinsælasta.