Björn Daníel með tvö mörk og Sverrir eitt

Björn Daníel Sverrisson og Sverrir Ingi Ingason  voru báðir á skotskónum í kvöld þegar Viking komst áfram í 3. umferð norsku bikarkeppninnar í fótbolta.

Viking-liðið vann þá 7-1 stórsigur á útivelli á móti Sola FK en þrjú af sjö mörkum liðsins voru íslensk.

Björn Daníel Sverrisson skoraði tvö, á 22. og 47. mínútur og Sverrir Ingi kom Viking í 4-0 á 33. mínútu með síðasta marki liðsins í fyrri hálfleiknum.

Fjórir af fimm íslenskum leikmönnum Viking voru í byrjunarliðinu en Jón Daði Böðvarsson byrjaði aftur á móti á bekknum að þessu sinni.

Björn Daníel spilaði fyrsta klukkutímann en Indriði Sigurðsson, Steinþór Freyr Þorsteinsson og Sverrir Ingi Ingason spiluðu allan leikinn. Jón Daði fékk ekki að spreyta sig í kvöld.