Helgarmaturinn - Súkkulaðikókos ostakaka

Ragnhildur Þórðardóttir einkaþjálfari sem oftast er kölluð Ragga nagli er með uppskrift af kökunni sem allir ættu að bragða um helgina. 

Botn

80 g Now-möndlumjöl (Fjarðarkaup, Hagkaup, Lifandi markaður)

20 g kókoshnetuhveiti

12 g Fiber Sprinkle (má líka nota mulið hrökkbrauð)

1 eggjahvíta

1 dl möndlumjólk

Fylling

450 g kotasæla

250 g kvark/hreint skyr/grísk jógúrt (1%)

2 msk. Now-erythriol (Fjarðarkaup, Hagkaup, Lifandi markaður)

1 msk. Walden Farms Marshmallow Dip (má sleppa)

1 tsk. súkkulaði, sykurlaust Jello-pudding-mix

1,5 msk. Hershey‘s ósætt kakó (Kostur)

Now-kókoshnetudropar

Aðferð

1. Hræra allt gumsið sem fer í botninn saman þar til það verður að deigi og hnoða í kúlu.

2. Setja kúluna á smjörpappírsklæddan botn úr smelluformi (20-25 cm í þvermál).

3. Setja annan smjörpappír yfir kúluna og fletja út með kökukefli þar til botninn hefur fyllt út í kantana.

4. Henda lummunni í 160°C heitan ofn í um 10 mínútur meðan fyllingin er gerð.

5. Hræra fyllinguna saman með töfrasprota.

6. Hella yfir botninn sem ætti nú að vera orðinn fallega gullinbrúnn.

7. Inn í ofn í 30-35 mínútur. Kakan á að vera aðeins „wobbly“ þegar hún kemur úr sólbaðinu.