Baltasar í viðræðum við stórstjörnur

Baltasar Kormákur stendur í stórræðum um þessar mundir. Hann hyggst hefja tökur á nýrri kvikmynd sinni Everest í október á þessu ári.

Margar heimsþekktar stórstjörnur úr kvikmyndaheiminum hafa verið orðaðar við myndina og nú síðast þeir Josh Brolin, Jake Gyllenhaal, John Hawkes og Jason Clark.

„Ég get staðfest það að við erum í viðræðum við þessa leikara,“ segir Baltasar.

„Það hefur enginn þeirra staðfest að þeir ætli að vera með, en við erum í samningaviðræðum sem stendur,“ bætir Baltasar við.

„Þetta eru náttúrulega allt frábærir leikarar og ég er rosalega ánægður með leikaravalið ef þetta gengur allt upp,“ segir Baltasar enn fremur.

Josh Brolin, Jake Gyllenhaal og John Hawkes hafa allir þegar hlotið tilnefningu til Óskarsverðlauna og eru stjórstjörnur í Hollywood.

Jason Clark er rísandi stjarna í kvikmyndaheiminum og fékk meðal annars mikla athygli fyrir leik sinn í kvikmyndinni Zero Dark Thirty sem kom út í fyrra.