Næsta plata árið 2015

Lars Ulrich, trommari Metallica, segir ólíklegt að ný plata með hljómsveitinni komi fyrr en árið 2015. Síðasta plata sveitarinnar, Death Magnetic, kom út 2008.

„Það kæmi mér á óvart ef við náum að klára heila plötu fyrir árið 2015. Við erum lengi að búa til plötur og við erum einnig uppteknir við marga aðra hluti. En við snúum okkur að þessu á endanum,“ sagði Ulrich í viðtali við Channel 24 í Suður-Afríku.

Þrívíddarmyndin Through the Never er væntanleg í bíó 27. september í Bandaríkjunum og viku síðar annars staðar.