Bílar

Kia hefur lúxusbílasölu í Bandaríkjunum

Finnur Thorlacius skrifar
Árleg bílasýningin í Los Angeles er haldin í næsta mánuði. Þar mun Kia kynna stóran lúxusbíl sem fengið hefur nafnið Kia K900. Þessi bíll er ekki alveg nýr af nálinni heldur þekktur sem Kia K9 í framleiðslulandinu S-Kóreu og hann átti að heita Quoris í Bandaríkjunum. Kia hefur greinilega tekið sönsum með það nafn, en flestum reyndist erfitt að bera það fram án þess að afmyndast í andlitinu á meðan.

Kia K900 er afturhjóladrifinn bíll og verður boðinn með aflmiklar 6 og 8 strokka vélar. Bíllinn er hlaðinn lúxusbúnaði og á að slá keppinautunum við í verði, en ódýrustu gerð hans má fá fyrir um 50.000 dollara. Samt er hann t.d. með 12,3 tommu snertiskjá, 360 gráðu myndavélakerfi og upplýsingum frá mælaborði er varpað uppá framrúðuna.

Kia K900 á systurbíl í Hyundai Genesis, sem gengið hefur vel að selja í Bandaríkjunum. Salan í fyrra á Genesis nam 33.973 bílum, en Kia áætlar aðeins að selja um 5.000 K900 bíla á næsta ári, ekki mjög háleitt markmið þar. Sala á Kia K900 hefst snemma á næsta ári vestanhafs. 

Mest lesið




×

Mest lesið