Vala Matt: Steinbítsréttur frá Suðureyri við Súgandafjörð og desert frá Fjöruhúsinu

Hér eru uppskriftir af steinbít og eftirrétt úr sælkeraþætti Völu Matt sem er á dagskrá á Stöð 2. 

Steinbítur í rjómakoníakssósu fyrir tvo

Steinbítur 600 gr

1 peli 36% rjómi

sjávarsalt og mulinn svartur pipar eftir smekk

1 tsk oskar grænmetiskraftur

1 msk koníak

Aðferð:

Steinbítur settur á heita pönnu ásamt koníaki og rjómanum bætt strax út á pönnuna.

Kryddið með salti, pipar og grænmetiskrafti.

Sjóðið rjómann niður þar til hann er þykkur eins og góð sósa með steinbítnum.

Ceviche frá Suðureyri Fisherman Ceviche Einn hluti gróft skorinn þorskur Einn hluti fínt skorin gúrka Einn hluti fínt skorin rauð og gul papríka Þorskur látinn marenerast í Lime safa þar til hann verður hvítur.

Þá er safinn sigtaður frá og öllu blanda saman í eina skál. Til að vinna á móti súra lime bragiðnu er gott að setja smá dass af sýróp eða hunang út í réttinn meðan öllu er blandað saman.

Desert frá Fjöruhúsinu á Snæfellsnesi

Bláberjaskyrkaka

Botn:  Bræðið saman sirka 100 gr smjör og smá súkkulaði og setjið svo mulið hafrakex (t.d. haustkex) saman við. Þrýstið þessu síðan í lausbotna form sirka 25 cm og látið þetta kólna. Leggið 3 blöð af matarlími í bleyti í smá stund og bræðið þau síðan í fjórum matskeiðum af bláberjasultu, helst heimalagaðri.

Hrærið 250 gr af rjómaosti og sirka þremur matskeiðum af sykri saman. Síðan er 500 gr af bláberjaskyri blandað saman við. Þá bræddu matarlíminu og síðast þeyttum rjóma, sirka 2 til 3 dl. Þetta er látið stífna í ca 4 til 5 klukkustundir og svo að lokum sett smá bláberjasulta yfir.