Helgi Valur eini miðjumaður AIK sem fékk að klára leikinn

Landsliðsmaðurinn Helgi Valur Daníelsson hefur verið orðaður við portúgalska liðið Belenenses en hann lék allar 90 mínúturnar með AIK í sænsku úrvalsdeildinni í fótbolta í kvöld.

AIK var búið að vinna þrjá leiki í röð en varð þarna að sætta sig við markalaust jafntefli á heimavelli á móti Mjällby á Friends Arena í Solna í kvöld.

Helgi Valur var á þriggja manna miðju AIK og sá eini af miðjumönnum liðsins sem kláruðu leikinn.

Samningur Helga Vals við AIK rennur út eftir tímabilið en fyrr á þessu ári var honum tilkynnt að hann myndi ekki fá nýjan samning hjá sænska félaginu. Portúgalska Úrvalsdeildarfélagið Belenenses hefur sýnt honum áhuga en það er frá höfuðborginni Lissabon.