Settu saman eigin bíl á 12 tímum

Þeir sem eru vanir að kaupa húsgögn í IKEA og setja þau saman sjálf gætu hæglega sett saman þenna bíl. Hann kemur semsagt ósamsettur og það tekur þrjá aðeins 12 tíma að setja hann saman. Flott helgarjobb. Bíllinn ber heitið OX og er bresk hönnun. Það tekur einungis 5,4 klukkutíma að smíða hann hjá framleiðandanum. OX er með stýrið í miðjunni en getur tekið allt að 13 manns, eða þrjár EURO pallettur af vörum. Bíllinn er með 2,2 lítra dísilvél og beinskiptingu. Hann vegur 1,7 tonn og 73% þyngdarinnar hvílir á framöxlinum, en þegar hann er hlaðinn hvíla enn 53% þar. Bíllinn hefur flutningsgetu uppá 2,2 tonn og getur farið í 76 sentimetra hátt vatn. Hann passar vel í einn gám ósamansettur og því þægilegur í flutningum. Ef eitthvað í bílnum skemmist eða bilar er ákaflega auðvelt að skipta sjálfur um hlutinn.

Hugsaður fyrir Afríku

Smíði bílsins er ekki síst hugsuð fyrir Afríkumarkað, þar sem ekki er mikið fyrir af bílum og kaupgeta lítil. Hönnun hans ber glöggt merki um þarfir Afríkubúa og þar gæti hann selst best. Engu að síður gæti orðið góð eftirspurn eftir OX hjá bændum í Evrópu sem þurfa einmitt á svona vinnuhestum að halda við sín störf. Hugmyndasmiður bílsins er Sir Torquil Norman, stofnandi Norman sjóðsins sem þekktur er fyrir að bjarga niðurníddum þekktum húsum. Norman er hinsvegar einnig mjög umhugað um þarfir íbúa í Afríku og hefur komið að fleiri framfaraverkefnum þar. Hann hefur lagt til 300 milljónir króna til að  búa til þetta fyrsta eintak bílsins, en þarf um 600 milljónir til viðbótar til að flytja bílinn yfir á framleiðsluhæft stig. Við vonum bara að það takist hjá Norman. Ekki er ljóst hvað bíllinn mun kosta, en ódýr á hann að verða.