Howard búinn að spila sinn síðasta leik fyrir Lakers?

Dwight Howard, leikmaður LA Lakers, var rekinn út úr húsi í nótt er San Antonio sópaði Lakers í frí. Það gæti hafa verið síðasti leikur Howard fyrir Lakers.

"Þetta er martröð og það er eins og maður geti ekki vaknað. Svona líður mér eftir þennan leik," sagði Howard eftir leikinn en hann vildi lítið ræða framtíðina.

Howard er með lausan samning í sumar og spá því margir að hann muni fara frá Lakers.

"Ég ætla að taka mér frí frá öllu í tvær vikur og hreinsa hugann áður en ég tala um næsta tímabil og hvað ég ætla að gera."

Howard var með 17,1 stig að meðaltali í leik í vetur en það er hans lélegasti árangur í fimm ár. Hann var þó með flest fráköst í deildinni eða 12,4 að meðaltali í leik.