„Aldrei hægt að eiga of marga stuttermaboli“

Þórunn Ívarsdóttir lagði stund á stílistanám í Fashion Insitute of Design & Merchandising í Los Angeles. Samhliða náminu hefur hún starfað sem persónulegur stílisti í Bandaríkjunum og vann meðal annars fyrir vefverslunina Nasty Gal. Þórunn flutti heim fyrir skömmu en hefur þó ekki sagt skilið við tískubransann. Hún hefur um nokkurt skeið haldið úti bloggsíðunni Double Pizzazz þar sem hún tjáir sig um tísku og setur inn myndir af því sem hún klæðist. Á síðunni býður hún líka upp á margskonar stílistaþjónustu og tekur meðal annars að sér persónuleg innkaup og heimsóknir í saumaklúbba.

„Tískuáhuginn vaknaði mjög snemma hjá mér og held ég að allir mínir nánustu gætu staðfest það. Ég hef alltaf haft gaman að því að að aðstoða fólk við að klæða sig og á auðvelt með að lesa fólk og það auðveldar mér að sjá hvaða snið og litir fara þeim vel", segir Þórunn um ástríðu sína á tísku.

Hvernig viðbrögð hefur stílistaráðgjöf eins og þú ert að bjóða upp á fengið hér heima? „Þetta er búið að fá rosalega góðar móttökur. Ég hef verið að taka að mér að aðstoða einstaklinga, saumaklúbba og jafnvel fengið stór verkefni hjá fyrirtækjum. Íslenskar konur klæða sig mjög vel en stundum þarf að beina fólki í rétta átt hvað varðar snið og liti. Að mínu mati vantar upp á að margar konur sig ekki samkvæmt vaxtalagi og aldri."

Hvaða flík er nauðsyn í fataskápinn fyrir sumarið að þínu mati? „Flottir stuttermabolir eru algjör nauðsyn í alla skápa fyrir þetta vor og sumar. Það er aldrei hægt að eiga of marga stuttermaboli í fataskápnum og þeir fara öllum vel. Mér finnst æði hvað það er hægt að algjörlega umbreyta lúkkinu á klassískum stuttermabol fyrir mismunandi tilefni. Þessa dagana hef ég það fyrir reglu að kaupa mína boli alltaf stærðinni fyrir ofan til að fá fram oversized lúkk. Svo klæðist ég þröngum gallabuxum við."

Bloggsíðu Þórunnar má finna hér.