Verðlaunaafhending Gulleggsins

Úrslit og verðlaunaafhending Gulleggsins 2013, frumkvöðlakeppni Innovit, fóru fram síðastliðinn laugardag í Háskólanum í Reykjavík. Þar kynntu 10 teymi viðskiptahugmyndir sínar fyrir dómnefnd en alls hófu 327 hugmyndir keppni í janúar.

Katrín Jakobsdóttir, mennta- og menningarmálaráðherra afhenti sigurteyminu verðlaunagripinn Gulleggið 2013 en alls námu heildarverðlaun keppninnar 3 milljónum króna.

Það var viðskiptahugmyndin SARdrones sem stóð uppi sem sigurvegari en fyrirtækið hefur hannað og þróað ómannað leitarloftfar og hugbúnað sem aðstoðar björgunarsveitir við leit og björgun.