Mexíkóskum bílaframleiðendum fjölgar

VUHL hefur fengið fjárstuðning frá Mexíkóskum yfirvöldum og meðal birgja eru Ford og Magna Steyr.

Það er ekki einungis Mastretta frá Mexíkó sem hyggst framleiða bíla á næstunni, nú er annar slíkur kominn fram sem heitir VUHL.

Skammstöfunin stendur fyrir "Vehicles of Ultra-lightweight and High-performance"­ og eins og nærri má geta ætlar fyrirtækið að framleiða sportbíla, eða öllu heldur ofursportbíla. Þeir verða í raun keppnisbílar sem löglegir verða á götunum. Ætlar VUHL að kynna fyrsta bíl sinn, VUHL 05 á bílasýningunni "Goodwood Festival of Speed" á þessu ári.

Stofnendur VUHL eru bræður sem erfðu bílaáhuga sinn frá föður þeirra, Guillermo Echeverria, sem var keppnisökumaður í GT- og formúlukeppnum. Grind nýja bílsins verður smíðuð í Kanada, en bíllinn síðan settur saman í Mexico City. Birgjar VUHL eru meðal annars Magna Steyr og Ford. Hefur VUHL fengið fjárhagslegan stuðning frá Mexíkóskum yfirvöldum.